CEBU, Philippines – Gi-ambusan ug gitabangan og pusil hangtod nga namatay ang usa ka tanod samtang nagsakay kini sa iyang motorsiklo paingon nga mopauli sa ilang balay gikan nga namista didto sa Sitio Bangkal, barangay Lamisa sa bukirang bahin sa lungsod sa Balamban, niadtong Martes sa alas 6:00 sa gabii.
Ang biktima nga gigukod pa sa mga suspek ug gitiwasan hangtud nga namatay una pa gibiyaan mao si Queliboy Selar Manigos, 38 , minyo, nga taga Lamisa.
Samtang duha ka mga lalaki nga nagtaptap sa ilang mga nawong ang gitumbok sa mga nakasaksi sa kremin nga maoy mibanhig patay sa biktima.
Si PO2 Cesar Climaco sa Balamban Police Station mibutyag sa Banat News nga samtang gikan nga namista ang biktima sa Sitio Bagakay paingon na unta kining mopauli sa ilang balay sa Lamisa, sakay sa iyang motorsiklo.
Apan paghiabot niini sa unahan, gi-atngan nang daan kini sa duha ka mga nagtaptap nga mga tawo ug gipusil makaduha ka higayon ug naigo sa tiyan ang biktima.
Bisan og samaron nakahimo pa gyud ang biktima sa pagpadagan sa motorsiklo niini aron pagsalbar sa iyang kaugalingon apan matud sa mga nakasaksi nga gigukod pa kini sa mga kriminal ug gitiwasan sa pagpusil hangtod nga natagak sa iyang gisakyan nga motorsiklo.
Dihang naklaro na sa mga kriminal nga patay na ang biktima, una pa kini mosibat pahilayo ug wala na hiabti sa kapolisan nga miresponde sa maong alarma.
Ang kapolisan padayon pa sa ilang imbestigasyon sa pagtumbok sa mga kriminal ug sa motibo sa maong pagpatay. – BANAT NEWS