CEBU, Philippines – Usa ka uyoan ang gipasakaan og kasong pagpanglugos human makakita og rason ug ebidensya ang piskalya nga nagsuporta sa alegasyon bahin sa krimeng iyang gibuhat sa iyang pag-umangkong babaye nga may deperensiya sa panghunahuna.
Si Cebu City Prosecutor Nicolas Sellon misang-at sa kasong pagpanglugos ngadto sa korte batok sa uyoan (ngalan gipugngan aron pagprotektar sa biktima ug sa ilang pamilya), taga Hipodromo ning siyudad sa Sugbu.
Si Sellon nagkanayon sa gidusong resolusyon nga nakita sa preliminary investigation nga may probable cause ang pagsang-at sa maong kaso batok sa akusadong uyuan ngadto na sa korte.
Kini human positibong gitudlo sa 17-anyos nga biktimang may kakulang sa pangisip nga ang uyuan niini maoy mipahimulos sa iyang pagkababaye.
Nasayran nga niadtong Oktobre tuig 2007 ang suspek mihaylo sa biktima nga kuyogon sa ilang panimalay apan pag-abot didto gipahimuslan kini sa suspek.
Ang inahan sa biktima nakamatikod sa paglugos sa suspetsado hinungdan nga nagpakitabang kini sa mga opisyales sa kapolisan alang sa pagreklamo.
Human mataho sa kapolisan ang maong insidente ug napasaka ang kaso sa piskalya wala mopakita sa gipuy-an ang suspek ug pabiling nagtagotago.
Ang City Prosecutor Office wala morekomendar og piyansa alang sa temporaryong kagawasan sa akusadong uyuan. - Chester Abadilla (BANAT NEWS)