CEBU, Philippines – Ipahigayon dinhi sa siyudad sa Sugbu ang 34th Visayas Area Qur’an Recital Assembly diha sa Rizal Memorial Library and Museum karong adlawa.
Kini salmutan sa 12 ka Muslim nga mobasa gikan sa tulo ka mga rehiyon sa Kabisay-an ug gipaabot usab nga tambungan sa mga sakop sa Interfaith group.
Ang interfaith group nga namugna sa sayong bahin niining tuiga, naglangkob sa nagkadaiyang mga relihiyon dinhi sa Sugbu.
Matud sa regional director sa Office on Muslim Affairs (OMA-7), Sakiran Hajan, nga ang contest maoy labing una dinhi sa Sugbu ug ang katuyoan mao ang pagsabwag sa mga pagtulun-an nga anaa napatik sa Qur’an sa mga Muslim.
“Para mahibaw-an gyud kung unsa ang Qur’an because Qur’an per se is not only concentrated on religious matters,” sumala ni Hajan.
Ang Sugbuanong Press Secretary nga si Cerge Remonde maoy pinasidunggang dinapit sa nahisgutang Qur’an reading competition.
Gipahibawo usab ni Hajan nga lakip sa ilang mga kalihukan karong adlawa mao ang pagpang-apod-apod og mga Qur’an ngadto sa nagkadaiyang unibersidad sa siyudad isip reference book. - Elly Bolonos (BANAT NEWS)