CEBU, Philippines - Patay ang usa ka wala mailhing lalaki human gibulit og bala sa wala mailhing mamumuno pasado ala-una kagahapon sa hapon sa sitio Palsy Side sa barangay Sambag Dos.
Ang biktima gibana-banang nagpangidaron og 30 pataas, nagsuot og maong nga shorts ug dark blue nga t-shirt nga may fatigue nga bullcap ug nag-tsinelas.
Wala na madala pa sa tambalanan gumikan sa daghang samad pinusilan diha sa iyang lawas.
Nakuha sa kapolisan ang 12 ka kabhang sa .9mm caliber nga bala, usa ka slug nga nag-ungot sa dughan ug laing upat ka slugs diha sa crime scene.
Walay bisan usa ka residente nga miangkong nakakita sa krimen apan ang kapolisan nagtuong duna gyu’y tawong nakasaksi niini apan nahadlok lang nga mopatim-aw tungod sa kabalakang maoy balikan sa mamumuno.Usa sa mga timailhan lang sa biktima mao ang patik diha sa tuong bahin sa iyang tiil nga “bad boy” ug laing patik sa dughan nga “Daling I love You.”
Matud pa ni PO2 Leroy Baguio sa pakighinabi sa Banat News nga posibleng gidul-itan pagpusil ang biktima tungod kay ang mga kabhang ug slugs duol ra kaayo sa nagbuy-od nga patay’ng lawas sa biktima.
Wala pa matino sa kapolisan ang motibo sa pagpatay samtang gisusi pa ang pagkatawo sa biktima. - BANAT NEWS