Lola gidaro sa Hilux, namatay

CEBU, Philippines - Patay ang usa ka 64-anyos nga lola human gidaro sa usa ka pribadong sakyanan nga nawad-an og preno ang tindahan niining gibantayan didto sa barangay Matab-ang siyudad sa Toledo niadtong Sabado sa alas 5:30 sa hapon.

Ang biktima mao si Rosario Almento Dacumos, 64 anyos, minyo ug molupyo sa nahisgutang lugar.

Samtang ang drayber sa Toyota Hilux nga dunay plaka nga GPS-675 mao si Christopher Cañete Dacumos, 30 anyos, minyo ug molupyo sa maong lugar samtang ang tag-iya sa sakyanan mao si Marlyn Ruegg, molupyo sa barangay Calongcalong sa maong siyudad.

Gibutyag ni Norman Laspoña, traffic enforcer sa dakbayan sa Toledo dihang nahinabi sa Banat News nga naglingkod sa lantay gawas sa tindahan ang biktima samtang ang sakyanan gikan sa barangay Sto. Niño ug paingon na unta kining mopauli sa barangay Calongcalong.

Apan pag-abot sa nahisgutang lugar dunay trak de karga nga gikasugat ang maong Toyota Hilux ug nakalitan kini ug iyahang gilihayan aron dili magkabangga apan didto na hinoon mopaingon sa tindahan daplin sa karsada ug na-atol nga naglingkod sa lantay ang biktima nga nagbantay sa tindahan. - Darrel A. Carumba (BANAT NEWS)