NBI-7 mosusi sa ebidensiya sa sunog sa F. Llamas ug Sabellano

CEBU, Philippines – Gipasa na ngadto sa National Bureau of Investigation-7(NBI) ang nakuhang ebidensya sa Cebu City Bureau of Fire nga nakuha gikan sa nahitabong sunog niadtong Biyernes sa kaadlawon sa eskina sa dalan F. Llamas ug Sabellano sa barangay Punta Princesa.

Matod pa ni SFO2 Roelyn Maratas, fire investigator sa Cebu City Bureau of Fire sa pakighinabi sa Banat News kagahapon nga ilaha nang gihatud sa NBI ang panaptong nanimahong kerosene nga nakuha diha sa fire scene sa mga arson investigators.

Ang maong trapo ingon man uban pang nakuhang abo ipailawom sa laboratory analysis sa mga chemist sa NBI-7 aron pagtino kung mao ba gyud kini sinugdanan sa maong sunog nga midanyos og P300 mil.

Ang arson investigators mosusi sa presensya sa flammable fluids nga posibleng gigamit sa pagsunog lakip na ang accelerant nga nakapadali sa pagkatap sa kalayo sa tibuok balay.

Ang sunog nakontrolar sulod sa pito ka minutos apan hingpit nga napawong alas 6 pasado na sa buntag.

Si FO1 Butch Labasbas nagkanayon sa pakighinabi sa Banat News nga ang maong sunog nagsugod sa panimalay nga gi-abangan ni Basilio Nadela nga gipanag-iya ni Rolando Avila.

Nalakip sa gilamoy sa sunog mao ang panimalay usab ni Avila nga usa ka two storey building.

Gisusi sa kabumberohan ang anggulong posibleng arson kon tinuyo ang pagkasunog niini gumikan kay giingong dunay pending nga eviction case diha sa korte si Avila batok ni Nadela kabahin sa maong panimalay. - Lesley Caminade (BANAT NEWS)