CEBU, Philippines – Walay foul play ang kamatayon sa usa ka revenue collection officer sa Mandaue City Treasurer Office (MCTO) kinsa nagpusil sa iyang kaugalingon sa sulod sa ilang panimalay niadtong miaging adlaw.
Kini ang nasayran sa Banat News gikan kang PO2 Roy Lim sa follow up nga gihimo sa kapolisan sa Homicide Section sa Mandaue City Police Office (MCPO) kagahapon.
Si PO2 Lim miingon nga ang biktima nga si Ricky Radjaie, 36, ulitawo nga nagpuyo sa dalan Mabini barangay Looc sa maong dakbayan ang namatay tungod sa pagpusil sa iyang tuong tampihak ginamit ang kalibre 45 nga armas.
Dugang pa niya nga milapos ang bala sa walang tampihak sa biktima nga maoy nakaingon sa kamatayon niini.
Matud pa ni PO2 Lim nga dako ang ilang pagtuo nga naglambigit sa trabaho ang hinungdan sa paghikog sa biktima .
Kini ilang nasayran subay usab sa ilang nakaplagan nga suicide note sulod sa lawak sa panimalay sa biktima diin mahitabo ang paghikog niini.
Ang suicide note nga gibilin sa biktima sa wala pa mahitabo ang paghikog nagpadayag sa iyang pagpangayo’g pasaylo ngadto sa iyang inahan, alang usab sa iyang labaw sa buhatan nga si Mandaue City Treasurer Lorna Atega ug sa iyang hinigugma.
Sa maong suicide note, iyang gipanghimakak ang mga katahap nga nangawkaw kini sa kuwarta sa kagamhanan sanglit ang tanan niyang transaksiyon isip revenue collection officer gibase man sa giluwatan niyang mga resibo.
Ang konseho sa dakbayan mihimo og mga pakisusi sa kahimtang sa operasyon sa ihawan sa barangay Labogon nakadiskubre og mga kakulian sa operasyon ilabi na sa koleksiyon.
Didto giingong nagsugod ang kaguol ni Radjaie.
Giklaro ni Konsehal Rosal nga ang ilang pakisusi sa operasyon sa maong ihawan ilang gitumong alang sa pagkuriher sa mga kakulian sa tinguha nga ma-renovate ug hingpit nga mahibalik ang normal niining operasyon. – BANAT NEWS