58 ka 'dancers' gi-rescue gikan sa bar

CEBU, Philippines – Mga babayeng entertainers sa night spots giluwas sa hiniusang operasyon sa grupong International Justice Mission (IJM), Department of Social Welfare and Development (DSWD) ug Criminal Investigation and Detection Group kagahapon sa kaadlawon diha sa Ouano Ave. sa barangay Mantuyong sa syudad sa Mandaue.

Si Atty. Samson Innocenio Jr. ug Audrey Sawechenco sa IJM miduol sa CIDG-7 aron magpatabang sa ilang ipahigayong rescue operation sa mga menor de edad nga mga babayeng dancers sa Egypt International Bar Complex.

Sumala pa sa kapolisan 58 ka mga babaye ang ilang naluwas gikan sa maong bar, wala hinuon ibutyag pila gyud ka menor de edad ang naapil niini apan sumala pa giingong kadaghanan kanila wala pa sa hustong edad.

Ang grupo sa CIDG-7 nga mikuyog sa operasyon gipanguluhan ni Chief Insp. Rogarht Campo.

Atol sa maong operasyon giapil pagsikop ang unom ka mga tawo duha kanila mga langyaw, usa ka Swiss national ug usa ka German national nga giingong mga tag-iya sa maong club.

Ang duha ka nahisgutang foreign nationals kansang mga pangalan wala ibutyag kasamtangan pang gi-imbestigahan sa CIDG-7 aron mapasakaan sa mga kaso.

Gikatahong usa sa mga ahensya sa gobiyernong mihangyong di una panganlan ang duha mao ang Department of Tourism hangtud nga di pa maklaro ang partisipasyon nila sa operasyon sa maong club. – BANAT NEWS