CEBU, Philippines – Milusad og lihok protesta kagahapon sa buntag atubangan sa buhatan sa Coastguard Station Cebu ang pamilya sa mga tripulante sa nalunod nga MV Edago Expedition tungod kay wala pa gihapoy gihatag nga tubag ang maong buhatan kun unsay hinungdan sa pagkalunod sa maong barko.
Ang maong barko nalunod usa na ka tuig ang milabay ug karong adlaw maoy sumad niini.
Matud pa sa mga asawa ug inahan sa mga namatayng tripulante nga gusto lang nilang mahibaw-an ang resulta sa imbestigasyon sa Special Marine Board of Inquiry.
Nitataw sila nga dili unta nila gustong magprotesta sa kadagkuan sa coastguard apan ilang gipangayo mao ang hustisya sa nangamatayng nilang mahal sa kinabuhi.
Si Lanie Israel, asawa sa namatay nga quarter master nga si Errol Israel mipadayag sa iyang kasagmuyo human sila gisaaran sa kadagkuan sa coastguard nga hatagan og resulta sa ilang imbestigasyon apan usa nalang ka tuig karung adlawa wala gyuy tubag nga ilang nadawat Sa iyang bahin si Coastguard Deputy Commander Anelito Gabisan nagkanayon nga nakasabot siya sa sentimento nga gibati sa mga kabanay sa mga tripolante apan iyang gipangayo ang dugang pagsabot sa kalangay sa maong kaso sa SMBI.
“We are doing our best in order to solve the problem and give answers to their questions,” dugang pang Gabisan.
Matud ni Gabisan nga sa pagkakaron ila pang gipaabot ang resulta sa Regional Trial Court (RTC) branch 12 human ilang nakompleto ang dugang gipangayo nga gikinahanglan sa maong buhatan niadto lang Marso 4 niining tuiga. Apan nidugang si Bagisan nga makahatag lang siya og katin-awan sa maong hitabo base sa mga ebidensya apan ila unang gipaabot ang resulta.
Apan laing usa ka asawa sa namatay nga tripulante mi-kwestyon sa coastguard nganong nagkinahanglan pa sila sa resulta sa desisyon sa korte sanglit ang ilang buhatan maoy adunay katungod sa pagpahigayon og Special Marine Board Inquiry. Sa suwat nga gipadala sa RTC branch 12 nga gipirmahan ni Presiding Judge Estella Singco, niadtong Hulyo 1 sa miaging tuig kini nag-ingong gi-set na ang husay sa maong kaso. Hinuon gipakig-estoryahan ni Gabisan ang mga kabanay sa mga tripolante ug gipasabot sa sitwasyon. - Rey Pasaporte (BANAT NEWS)