Lawihan Festival mas paninduton

CEBU, Philippines – Gipaabot ang mas dako ug mas mabulukon nga Lawihan Festival sa isla sa Malapascua, lungsod sa Daanbantayan sunod tuig.

Kini human sa malampusong paglusad niini niadtong Lunes atol sa kapistahan sa patron sa isla, Nuestra Señora Virgen delos Desamparados.

Matud pa ni Kapitan Rex Novabos sa barangay Logon nga mas naila nga isla sa Malapascua nga nakita nila kun unsay kakulangan sa pagpahigayon sa maong festival ug makorehian na kini sunod tuig.

Ang Lawihan Festival nakadugang na sa talan-awon ug kalingawan sa mga lokal ug mga langyaw’ng turista sa isla sa Malapascua maong ipahigayun na kini matag tuig.

Laing paningkamutan ni Novabos mao ang pagpangita og mas daghang sponsors human nalusad na ang maong festival sa ilang barangay.

Usa sa daku nga nagpaluyo mao si Kongresista Benhur Salimbangon ug igsoon niini nga si Mariquita Salimbangon-Yeung kinsa personal nga misaksi ug nahimo pang usa sa mga maghuhukom.

Ang Lawihan Festival gisalmutan sa unom ka grupo gikan sa nagkalainlaing sitio sa barangay ginamit ang mga daan nga sapot sa Tribu Malapascua sa Haladaya Festival sa lungsod sa Daanbantayan.

Ang Lawihan Festival may kaugalingon na nga festival song nga maoy gisayawan atol sa showdown competition.

Ang Lawihan Festival gikan sa pulong “lawi” nga mao ang taas nga ikog sa iho nga makita lang sa kadagatan sa isla sa Malapascua.

Gituohan sa katawhan nga ang ihong lawihan gihatag sa Makagagahum pinaagi sa milagrosong Birhen aron paglingaw sa mga turista ug pagpalambo usab sa kahimtang sa katawhan.

Dugang nakalingaw sa mga turista mao ang fluvial parade diin giapilan sa dul-an usa ka gatus ka mga dagku ug gagmay’ng sakayan sa kadagatan ug ang mga langyaw’ng turista mismo ang nangapil sa parada libot sa isla. - Gregg Rubio (BANAT NEWS)