CEBU, Philippines – Usa ka piniriso nga nag-atubang og kaso nga pagpayuhot og gidiling drugas ingon man illegal possession of firearms mipuga gikan sa detention cell sa Borbon Police Station sa lungsod sa Borbon niadtong Martes sa alas 10 sa buntag. Ang naka-eskapo nga piniriso mao si Edison Arnado Cabahug, 36, ulitawo ug molupyo sa barangay Tagnukan sakop sa maong lungsod ug nabilanggo sa kasong pagpayuhot og gidiling drugas ingon man paghupot og armas nga walay lisensiya.
Matud ni Insp. Camilo Gonzaga, hepe sa Borbon Police Station sa dihang nahinabi sa Banat News migamit og puthaw gikan sa higdaanan nga gitangtang ang maong piniriso ug maoy giligwat sa karaan na nga berha sa luyo nga bahin sa selda ug pag-abli didto kini moagi paingon nga migawas sa luyo nga bahin sa police station.
Subay sa inisyal nga imbestigasyon ni Insp. Gonzaga wala makabantay ang jail guard on duty nga si PO1 Bonifacio Gabod ug ang outgoing nga si PO3 Jose Cejano tungod kay pulos kini nag-ilis sa ilang uniporme niadtong tungora aron magpuli og duty.
Ang nahabiling upat ka piniriso mao nalay misinggit ug nagpahibalo nga nakapuga na si Arnado nga kusog kaayong misum-ok sa katunggan nga bahin luyo sa police station ug wala na gyud kini maabti pa sa naggukod nga mga polis.
Matud ni Insp. Gonzaga niadto pang Mayo 2 nadakpan ang suspek atol sa buy-bust operation tungod sa pagpamaligya og gidiling drugas ingon man nakuhaan usab kini og paltik nga armas hinungdan nga gibalhog sa bilanggoan human napasakaan og kaso.
Gawas niini, gihulagway usab ni Insp. Gonzaga ang suspek nga badlongon sa ilang lugar ug gani kanunay lang kining magbalik-balik sa bilanggoan tungod sa mga kaso nga pagpangawat, ilegal nga pagpanagat ug uban pa.
Sila si PO1 Gabod ug PO3 Cejano ipaubos hinuon sa imbestigasyon ug matud ni Insp. Gonzaga iya kining pasakaan og kasong kriminal ug administratiba sa pagpabaya niining nahimo nga miresulta sa pag-eskapo sa piniriso.
Hinuon giklaro niya nga magpabilin nga mo-duty ang maong duha ka polis samtang magpadayon ang imbestigasyon tungod usab sa kakulang nila og mga police personnel. - Darrel A. Carumba (BANAT NEWS)