Polis nanghingi og bihag nagpaboto

CEBU, Philippines – Polis nga hubog nagpabuto sa iyang armas tungod sa kasuko nga ang bihag nga manok nga iyang gipangayo sa tigbakayan gikuhaan og paa niadtong Domingo sa hapon didto sa Sitio Panagdait, barangay Basak San Nicolas.

Ang polis nga gipaparelibuhan na kagahapon mao si PO2 John Paul Bacalso, 45, sakop sa Mambaling Police Station.

Gibalhin kini sa Central Beat Patrol ubos sa Operations Office sa Cebu City Police Office.

Ang hepe sa kapolisan sa dakbayan Sr. Supt. Patrocinio Comendador nagkanayon nga iyang gimanduan kagahapong adlawa si Sr. Insp. Pablo Cabildo sa Mambaling sa pag-relibo kang PO2 Bacalso   aron malikayan ang pagpang-harras niini ngadto sa mga reklamante.

Giklaro ni Comendador nga dili na sila sa CCPO mopahigayon og imbestigasyon batok kang PO3 Bacalso   tungod kay mahulog na unyang forum shopping ang ilang imbestigasyon gumikan kay ang reklamante nakaduso na og reklamo sa buhatan sa People's Law Enforcement Board (PLEB) ubos sa buhatan ni acting Mayor Michael Rama.

Usa ka Arnel Flores nga residente sa barangay Basak-San Nicolas ug nanawag sa Mobile Patrol Group ug sa SWAT Team sa dihang nagpabuto si PO2 Bacalso tungod sa iyang kasuko nga giputlan og tiil ang bihag nga manok nga iya pinangayo sa tigbakayan sa sitio Panagdait.

Matud pa ni Flores nga mga alas 5:30 sa hapon niadtong Domingo natigayon ang tigbakayan didto sa nahisgutang dapit diin ang manok sa ginganlan lang og Jackneck ug Joseph Cabonilas gitari ug nagtabla.

Apan pipila ka gutlo naabot ang hubog nga si PO2 Bacalso nga nagsakay sa iyang motorsiklo ug sa dihang nanaog nangayo gilayon kini'g bihag nga manok hinungdan nga wala na lang makabalibad ang tag-iya nga si “Jackneck” ug gihatag ang iyang manok nga gikuhaan niini’g   paa.

Sa dihang nadawat na ni PO3 Bacalso ang manok hilabihan niining sukoa human nakit-an niini   nga kinuhaan na og paa ang manok ug sa kasuko niini mibunot kini sa iyang armas ug nagpabuto.

Sumala pa ni Flores napiksan siya ug iyang mga kauban sa yuta nga miigo sa bala apan maayo nalang gani kay walay nangaigo niadtong higayuna. Samtang ang polis daling misibat.

“Ako man iyang gipasanginlan nga nikuha sa paa sa manok nga ang tag-iya man unta nga si Jackneck, gani nidugang pa kini sa pag-ingon nga sige lang gyud mo diri ha,” sumala pa ni Flores.

Sa dihang ilang gi-report sa police station, ilang naabtan si PO3 Bacalso nga mi-duty sa Mambaling Police Station bisan hubog kini .

Niadtong Lunes, ilang gi-report sa buhatan ni Konsehal Augustus Pe Jr. ug gi-imbestigar na karon sa PLEB sa Cebu City Hall ubos sa buhatan ni Rama.

Si Sr. Insp. Pablo Cabildo hepe sa Mambaling Police Station nagkanayon nga sa dihang naabot si PO3 Bacalso sa police station nga hubog iya kining nahibaw-an nga nagpabuto sa iyang armas.

Iya gilayon kining gidisarmahan ug gipaubos sa liquor test sa Cebu City Medical Center niana nang alas 10 pasado sa kagabhion niadtong Domingo apan migawas nga negatibo sa ilimnong makahubog.

Si Kapitan George Rama sa Basak San Nicolas mikonpirmar nga daghan na siya og nadungog batok sa nahisgutang polis nga kanunay’ng hubog nga manghingi og manok kun dunay magtigbakay.

Hinuon si Rama miklaro nga igo lang siyang mitabang sa reklamo ni Flores ug nagpaabot sa pagduso usab og affidavit   uban sa mga saksi sa maong insidente.

Samtang si PO3 Bacalso nga nahinabi sa DySS hugtanong mihimakak sa maong mga pamasangil nga nangayo siya’g bihag, samtang dili usab siya mokomentaryo labot   sa iyang paghubog-hubog ingon man pagpabuto og armas.

Matud pa niini nga iya lang atubangon ang   pasangil sa “proper forum” kun ugaling duna na siya madawat nga reklamo. – BANAT NEWS