CEBU, Philippines – Hingpit na nga misuporta karon sa kagamhanan ang New Guardians Brotherhood Incorporated (NGBI) nga kanhi giingong midapig sa mga walhong pundok.
Kini pinaagi sa pagpananom og mga kahoy nga pagatpat ug pagpanghinlo sa baybayon sa lungsod sa Cordova sa dili muminos 50 ka sakop sa NGBI Cordova Chapter niadtong Sabado sa buntag.
Gilimpyohan usab sa maong grupo ang kadagatan sa Cordova pinaagi sa pagpanghipos sa mga basura nga gibanlas sa daplin sa baybayon.
Matud ni Avelino Sumalinog, ang Presidente sa NGBI sa Cordova nga mibulontaryo sila sa pagserbisyo aron pagpakita sa ilang suporta sa gobiyerno ilabina sa kagamhanan sa Cordova nga gipangunahan karon ni Mayor Adelino Sitoy.
Ang mga pagatpat nga ilang gipananom maghatag usab og dugang proteksyon sa daplin sa kadagatan sa maong lungsod aron pahuwayan ug itloganan sa mga isda.
Miingon si Sumalinog nga himoon na nila kini matag buwan aron ipamatuod nila ang ilang hugot nga suporta sa gobyerno sukwahi sa pagtuo sa katawhan nga kaalyado sila sa walhong pundok. - Darrel A. Carumba (BANAT NEWS)