Giabswelto sa drug possession case
CEBU, Philippines – Laing gidudahang drug suspect ang giabswelto sa korte ang kasong kalapasan sa Section 11 Artikulo II, RA 9165 kon possession of illegal drugs tungod sa paghupot og duha ka sticks nga marijuana.
Ang naabswelto sa kasong paghupot sa illegal nga drugas mao si Jimboy Vismanos, 21, usa ka tinun-an sa high school nga taga barangay Ermita ning syudad sa Sugbo .
Si Regional Trial Court (RTC)-7 Branch 13 Judge Meinrado Paredes nagkanayon sa iyang upat ka pahinang desisyon nga wala magpasabot nga inosente si Vismanos sa maong salaod.
Apan ang kapakyas sa prosekusyon pagmatuod nga si Vismanos gyud maoy nagkupot ug nanag-iya sa maong marijuana nga napunitan sa kapolisan atol sa gipahigayong checkpoint niadtong Hulyo 26, 2006 alas 10:00 sa gabii sa dalan Katipunan ug A. Lopez sa Calamba ning dakbayan.
Si Paredes miingon nga wala dayon giimbentaryo ug gikuhaan og hulagway ug gihatagan og resibo sa kapolisan ang suspek nga pagpamatuod nga sa iyaha kini makuha.
Dugang pa niini ang kapakyas nila pagsunod sa section 21 sa maong balaod nga nagmandong kinahanglan sa presensya sa media, representante sa DOJ, LGUs nalitratohan ug namarkahan ang ebidensya.
Hinungdan nga giabswelto ni Paredes si Vismanos apan gimandong kumpiskahon ang duha ka stick nga marijuanang ebidensya. - Genevieve F. Dolino (BANAT NEWS)
- Latest
- Trending
