CEBU, Philippines – Padayong monitoron sa Department of Health (DOH-7) ang duha ka gi-quarantine nga pasyente sulod sa Vicente Sotto Memorial Medical Center (VSMMC) bisan paman og negatibo ang resulta sa ilang laboratory test niini Ug ma-release sa maong tambalanan.
Gipasabot ni Dr. Coralou Kintanar in-charge sa A(H1N1) Enfluenza virus monitoring sa DOH-7 dihang nahinabi sa Banat News bag-o Ug dili kasarangan ang maong sakit hinungdan nga dili gyud sila mokompyansa.
Kagahapon sa hapon pormal NAng gipahibalo sa DOH nga negatibo sa mga sintomas ang duha usa kanila mao ang 32-anyos nga OFW gikan sa Ireland ug miagi sa Hong Kong nga gi-confine sa isolation room sa VSMMC.
Matud ni Kintanar di gyud sila hingpit pasagdan ilabi na kung mobalik ang ilang mga hilanat sa mosunod nga mga adlaw.
Subling giklaro ni Kintanar nga wala pa gyud makasulod dinhi sa nasud ang maong gikahadlokang sakit.
Samtang mapasalamaton ang Quick Response (Q-Team) sa dakbayan sa Sugbu nga negatibo sa swine flu ang duha.
Sama sa British national, negatibo gihapon sa makamatay nga kagaw ang resulta sa throat swab samples nga gisusi sa Research Institute for Tropical Medicine (RITM).
Matud sa labaw sa Q-Team, Doctor Nestor Alonso, nga dako og natabang ang Oratio Imperata sa simbahan sa pagpabiling swine flu-free sa nasud partikular na dinhi sa Sugbu.
Apan bisan pa niini gipadayag sa labaw sa Q-Team nga magpadayon gihapon ang ilang information campaign ug pagpangandam labot sa nahisgutang sakit.
Partikular na niini ang pag-edukar sa mga mulopyo sa kabarangayan kung unsa ang swine flu ingon man ang buhaton niini kung makasulod sa nasod ang maong virus.
Samtang giawhag sa Hunta Probinsyal sa Sugbu ang DOH nga hingusgan ang pag-isyu og travel warning sa mga pasahero paingon ug mangabot gikan sa nasud sa Mexico ug sa ubang kanasuran nga gihugpaan sa maong virus.
Si Board Member Victor Maambong nagkanayon nga kinahanglang magbinantayon na gyud ang mga Sugbuanon kalabot sa makamatay nga kagaw.
Sila si Board Members Agnes Magpale ug Benjun Mondigo midason sa panawagan sa publiko nga kanunayon ang pagpanglimpiyo sa panglawas sanglit kini maoy giingong epektibong paagi aron malayo sa maong sakit. - Darrel Carumba uban sa report nila ni Elly Bolonos ug Rey Pasaporte (BANAT NEWS)