Jeepney drivers nakurat

CEBU, Philippines – Labihang kurata sa kapin 500 ka mga driver sa mga pampublikong mga sakyanan sa dakbayan sa Sugbu dihang gipakuratan sila og pangdakop sa mga traffic enforcers sa siyudad.

Kini subay usab sa hingpit nang pagpatuman sa City Traffic Operations and Management (Citom) niining semanaha sa City Ordinance 2000 nga usa ka amendatory ordinance nga naaprubahan pipila ka buwan na ang nakalabay isip travel lines sa mga PUJ.

Apan sa dili pa hatagan og detalye sa rota ang usa ka jeep de pasaheroan gikinahanglan una nga ang PUJ nakatuman sa ubang ordinansa sa dakbayan.

Kini sama sa pagbutang og garbage receptacle sulod sa sakyanan, hustong gidak-on sa route number, tukmang litra sa rota ug sa uban pang mga ordinansa sa siyudad. Sumala pa kapin sa 500 na ka mga jeepney drivers ang gidakop sukad niadtong adlaw’ng Lunes gumikan sa mga ginagmay’ng kalapasan nga nalatid sa maong amendatory ordinance.

Nasayran sa Citom nga walay mga PUJ nga nakatuman sa tanang ordinansa nga ilang gipatuman hinungdan nga gipangdakop ang mga puj driver sa nagkadaiyang kalapasan.

Tungod niini, nagpunsisok karon ang mga PUJ operators nga nagpakisayod sa buhatan sa Citom sa mga ordinansa nga angayan nilang tumanon.

Butang nga gihangop usab ni Citom executive director Arnel Tancinco tungod sa kooperasyon nga gipakita sa mga nanag-iya sa mga jeep de pasaheroan.

Partikular na niini, ang City Integrated Transport Services and Cooperative (Citrasco) nga giingong dunay gatusan ka mga sakyanan.

“Very cooperative gyud ang Citrasco diri dayon sa atong buhatan si Ryan Yu asking sa submission sa ilang 800 member units,” sumala ni Tancinco.

Gibana-bana sa Citom executive director nga dunay kapin sa 6 mil ka mga jeepneys nga magbiyahian dinhi sa dakbayan nga gikinahanglang motuman sa bag-ong ordinansa. Dakong multa ang nagpaabot sa mga driver o sa mga operator sa higayon nga madakpan nga nakalapas sa ordinansa ug ma-isyuhan og citation ticket.

Ang multa naglakip sa P800 sa unang higayon, P1,000 sa ikaduhang higayon ug P1,500 kung madakpan pa sa ikatulong higayon. – BANAT NEWS