CEBU, Philippines – Ang pangulo sa kapolisan lukop nasud nga si General Jesus Versosa mimando sa pagtabang sa Local Governments Units pagsumpo sa gikahadlokang sakit nga H1N1 virus o nailang swine flu.
Si Versosa atol sa pagduaw dinhi sa Sugbu kagahapong adlawa aron pagtambong sa pagsubo sa bag-ong building sa Regional Special Training Units (RSTU) sa lungsod sa Sibonga mimando sa Regional Health Office sa kapolisan lukop nasud nga moabag ang mga doktor sa mga LGU’s sa pagkumbati sa makamatay’ng sakit nga swine flu.
Hinuon iyang giklaro nga sa pagkakaron ang ilang priority ang Regional Health Office lang una sa kapolisan nga gikinahanglang mangandam ug mamalit og mga gamit sama sa face mask.
Alang kaniya dili pa alarming ang maong isyu nga gikinahanglang palihukan ang tanang buhatan sa kapolisan.
Ang kapolisan dinhi sa dakbayan sa Sugbu ang una nang mipahibalo nga andam moabag sa Department of Health sa pag-secure sa mga tawo ingon man lugar nga butangan sa mga mabiktima sa nahisgutang sakit.
Nasayran nga ubay-ubay na ang namatay ingon man natakbuyan sa maong sakit diin didto nagsugod sa nasud sa Mexico. - Guam Logroño (BANAT NEWS)