CEBU, Philippines – Usa ang namatay ug tulo ang nalandig sa tambalanan human maglisud og ginhawa sa dihang misulod ilawom sa atabay aron unta pagpanglimpyo sa tubig niini didto sa barangay Dumlog, siyudad sa Toledo niadtong Martes sa alas 3:30 sa hapon.
Ang dead on arrival sa Toledo City District Hospital mao si Socrates Capacite, 64, minyo ug molupyo sa nahisgutang lugar samtang ang kauban niining pulos nalandig sa tambalanan mao ang iyang bayaw nga si Steward Jamilano ug magsuon nga si Jordan Abellanosa ug Ariel Abellanosa, mga molupyo sa nahisgutang lugar.
Matud ni PO2 Dante Hilo sa Toledo City Police Station sa dihang nahinabi sa Banat News subay sa blotter nga gibasehan niini nga sila si Steward ug Jordan maoy unang nagkasinabot nga mosulod ilawom sa atabay aron limpyohan sa mga sagbot ang tubig niini.
Miuna og sulod sa atabay si Jordan ug pag-abot niini sa gibanabanang 40 ka tiil ang gilaw-mon kalit lang kining nakuyapan ug sa dihang nakit-an kini ni Steward nga diha sa ibabaw nga bahin nagdali kini nga nanaog aron luwason kini apan mao na usab kini ang naglisod og ginhawa og dayon misinggit pagpangayo og panabang.
Si Socrates nga nakadungog nagdali usab dayong mikanaog ilawom sa atabay aron luwason ang duha apan mao na usab kini ang nagluya human maglisod og ginhawa ug nakuyapan hinungdan nga mi-rescue usab dayon si Ariel ug pag-abot niini sa ilawom dihang namatikdan niini nga naglisud na usab siya og ginhawa nangayo kini og panabang sa mga silingan hinungdan nga gi-itsahan kini og pisi nga maoy iyang gigamit pagsaka balik sa taas, gi-anam-anam og luwas ang mga biktima nga nakuyapan ilawom sa atabay.
Daling gihatod sa tambalanan ang upat apan gideklarar sa mga doktor nga dead on arrival si Socrates tungod sa suffocation. - Darrel A. Carumba (BANAT NEWS)