CEBU, Philippines - Ang paglab-as sa kaisipan sa kapolisan bahin sa tukmang paagi sa pag-imbistigar sa unsa mang krimen maoy ipahigayon sa mga kadagkoan sa maong kuwerpo karong semanaha dinhi sa rehiyon pinaagi sa usa ka seminar.
Kini pinaagi sa pagpatuman sa duha ka adlaw’ng ‘refresher training course ’ alang sa mga imbestigador sa kapolisan dinhi sa rehiyon 7.
Si Supt. Audie Villacin, ang hepe sa Regional Investigation and Detective Management Branch (RIDMB) maoy mibutyag niini sa Banat News.
Matud pa niya nga mokabat sa 60 ka mga imbestigador sa kapolisan sa tibuok rehiyon 7 ang ipa-ubos sa maong refresher course, human maputos sa mga pagsaway ang kapolisan sa Quezon City Police District gumikan sa mga sipyat nila sa ilang pagsikop kang TV newscaster ug TV Personality nga si Ted Failon sa miaging semana.
Matud pa ni Supt. Villacin, nga ang maong seminar, wala magpasabot nga less competence ang mga imbestigador sa kapolisan dinhi sa rehiyon kundili kabahin lang kini sa pagpahinumdom kanila sa mga bag-ong pamaagi sa investigation.
Gisugyot hinuon ni Supt. Villacin ngadto sa Camp Crame nga kadtong mga maayong imbestigador maoy angay ipadala dinhi sa rehiyon aron maoy motudlo sa ilang mga sakop dinhi. – BANAT NEWS