CEBU, Philippines - Gihigpitan karon ni Mayor Jonas Cortes sa dakbayan sa Mandaue ang pagpabantay sa Butuanon river human mamatay ang usa sa illegal nga nangubkob og bas niadtong miaging gabii.
Kini samtang padayon pang gipangita sa kapolisan si Junever Yano, ang kauban sa namatay nga natabunan sa kinubkob nilang bas sa sapa sa Butuanon.
Matud pa ni PO1 Niel Aguilar sa Casuntingan Police Station 3 nga si Yano mao gyu'y makatug-an sa tinuod bahin sa nahitabo ni Leo Navarro, 27, minyo nga taga Casuntingan kinsa nahunosan sa kinabuhi samtang diha sa iyang ilegal nga pagpanguha og bas sa maong sapa.
Si Navarro ug Yano didto magkawat-kawat og pangubkob og bas sa sitio Lub-ang, sa barangay Tingob, dakbayan sa Mandaue, dihang nalusno ang gipundok nilang bas ibabaw sa ilang dakong lungag sa daplin sa sapa.
Si PO1 Aguilar mibutyag sa Banat News nga dugay na nilang gibantayan ang illegal quary sa maong dapit sa paglikay sa dugang kadaut sa Butuanon River.
Apan bisan pa niini wala gyud mopatuo ang mga tawo, mangawat gyud og bas magabii hangtod nga misangpot kini sa kamatayon ni Navarro.
Midugang si PO1 Aguilar nga labi na karong gipahigpitan ni Mayor Cortes ang pagbantay sa sapa Butuanon batok sa mga kawatan og bas aron nga dili masubli ang nahitabo kang Navarro.
Apan labaw sa tanan dili gusto si Cortes nga mosamot ang kadaot sa Butuanon river. – BANAT NEWS