Piskal Castro wa mabalaka sa kiha

CEBU, Philippines – Wala mahadlok si Cebu City Assistant City Prosecutor Mary Ann Castro sa tulo ka mga reklamong pagpangilkil nga gipasaka batok kaniya nga giduso ni BID-7 Regional Director Casimiro Madarang III ngadto sa buhatan sa Ombudsman Visayas sa milabay’ng adlaw.

Matud pa ni Fiscal Castro dali ra ang pagpasang-at og kaso batok kaniya apan ang pagprobar niini lahi usab nga sagubangon unya sa mga kihante pagpakombikto kaniya.

Nagduda usab si Castro nga tumotumo ug way basehanan ang mga affidavit sa mga mireklamo batok kaniya ug andam siya nga moatubang niini ngadto sa Ombudsman.

Samtang si Madarang sa iyang bahin mipadayag nga ang mga affidavit nga iyang gisumiter ngadto sa Ombudsman pulos mga pinanumpaang pamahayag sa ilang reklamo batok ni Castro.

Matud pa ni Maradarang isip director sa BID-7 kinahanglan nga molihok siya sa mga reklamo batok ni Castro sa tulo ka mga kliyente sa BID-7 ug aron nga dili siya ma-bias sa maong pagtratar sa reklamo iya kining giduso ngadto sa Ombudsman Visayas aron sila na ang motan-aw sa kasong posibleng ipasaka batok ni Castro.

Kahinumduman nga tulo ka mga reklamante nga sila si Atty. Kim Grace Mendoza miluwat og affidavit nga nagtumbok ni Castro nga nangayo og duha ka mga luhong sakyanan sa kliyente niining Hapones sa milabay’ng tuig bugti sa hulgang i-deport ang maong langyaw gumikan sa iyang pag-over staying dinhi sa nasud.

Laing affidavit giluwatan ni Ron Elier Eodis ug Elizabeth Cabilin diin mitumbok ni Castro ug sa iyang tawong si Linda Tiu nga nangayo kanila og P15 mil nga package fee sa transaksiyon niini sa Board of Special Inquiry kon BSI.

Ang maong bayrunon nagkantidad ra gyud unta og P2, 300 ug sa dihang midangop ang mga reklamante sa NBI-7 gikatahong gibakwi kini ni Castro ug gitug-anan sa tinuod nga presyo. Laing mireklamo ug miluwat og pinanumpaang pamahayag mao si Lenny Nuñez-Nengasca nga miakusar kang Castro ug ang mga kauban nga nangayo usab og P15 mil bugti sa transaksiyon niini sa buhatan niini sa BSI. - Bong Soriano (BANAT NEWS)