'Oratio Imperata' vs. H1N1 virus sugdan paglitok sa matag misa

CEBU, Philippines – Lakip na karon ang simbahan nabalaka sa padayong pagkatap sa gikahadlukang sakit nga swine flu virus nga gitawag na karon og “H1N1 Influenza A” kon H1N1 flu virus.

Ang Arsobispo sa Sugbu nga si Ricardo Cardinal Vidal mimando sa paglitok sa “Oratio Imperata” ngadto sa tanang kaparian ug mga parokyano sa tibuok lalawigan.

Ang Oratio Imperata mao ang usa ka kamanduan sa pag-ampo nga luwatan sa kadagkuan sa simbahan kung dunay umaabot nga dagkong kalihukan o mga katalagman.

Matud sa tigpamaba sa Simbahan sa Sugbu nga si Monsinyor Achilles Dakay nga posibleng luwatan sa Cardinal ang “mandated prayer” niining semanaha.

Kini sa higayon nga mahabalik na ang Arsobispo sa Sugbu nga tua pa karon sa kauluhan mitambong usab og pipila ka mga kalihukan.

Matud pa ni Dakay gikinahanglan ang pag-ampo sa katawhan ilabi na sa mga Sugbuanon niining panahona aron dili makalabang sa nasod ang makamatay nga virus.

“Gikinahanglan gyud nga mag-ampo ta nga dili matakbuyan anang maong flu, kung naa man gani nga unta andam atong mga ahensya sa gobyerno,” sumala ni Dakay.

Ang Monsinyor nag-awhag sa kagamhanan ilabi na ngadto sa Department of Health (DOH) nga seryusuhon niini ang gisugdan ug gihimong pagpangandam.

Kini aron mahibawo sa angayan nilang buhaton ilabi na ang nagkadaiyang tambalanan kung dili mapugngan ang pagsulod sa nahisgutang sakit dinhi sa nasod.

Nagpabilin pa hinuong swine flu free ang Pilipinas taliwa sa unang gikataho nga dunay pipila ka mga pasahero sa eroplano nga nahiabot sa nasod nga gipanghilantan.

Sintomas sa natakbuyan og H1N1 flu virus mao ang pagtaas sa body temperature, pagsige og ubo, pagpangsakit sa lutahan, pagsuka ug uban pa.

Kapin na sa 160 ka mga tawo ang gikatahong namatay sa Mexico diin magsugod ang nahisgutang sakit, wala pay labot niini ang libuan nga anaa sa tambalanan.

Sa nasayran, ang H1N1 flu virus nitabok na sa ubang kanasuran sa Amerika, Urupa, Africa, ug bisan gani sa kasilinganang nasod dinhi sa Asya.  - Elly Bolonos (BANAT NEWS)