Mga drayber sa Talamban, Mandaue, Inayawan i-drug test

CEBU, Philippines – Gitinguha karon sa konseho sa siyudad sa Sugbo nga mapaubos sa kinalit nga drug test ang mga drayber sa publikong mga sakyanan nga magbiyahian sa dakbayan.

Ang City Council pinaagi sa resolusyon nga gipalabang ni Konsehal Ritchie Osmeña moawhag sa LTO ug Citom nga maoy mopahigayon sa kinalit nga drug test.

Kini tungod kay ang nahisgutang mga buhatan giingong maoy gitahasan pagpatuman sa mga lagda sa trapiko dinhi sa siyudad.

Matud ni Osmeña nga dunay mga PUJ ug taxi driver nga kadudahan og postura ug kini angayang mapaubos sa random drug test.

Labaw sa tanan, dunay mga drayber nga posibleng ubos sa impluwensya sa ginadiling drugas hinungdan nga kusog magpadagan sa ilang gimaneho nga sakyanan.

Partikular nga mga rota sa mga PUJ nga naobserbahan sa konsehal nga dunay kusog magpadagan nga mga drayber mao ang Talamban, Mandaue ug Inayawan.

Gusto ni Osmeña nga ang mga puj driver sa nahisgutang mga rota maoy unang ipaubos sa kinalit nga drug test sa LTO ug Citom.

Tumong sa konsehal sa random drug test mao ang pagseguro sa publiko ilabi na sa mga sumasakay nga dili adis-adis ang drayber sa ilang gisakyan nga PUJ o taxi.

“Makatabang gyud ang random drug test for the safety sa katawhan specially sa riding public nga ang atong mga drivers are not taking drugs,” sumala ni Osmeña.

Buot lang sa konsehal nga maminusan kun dili man hingpit mawagtang ang drug addict nga mga drayber sa pampublikong mga sakyanan nga magbiyahean sa dakbayan. - Elly Bolonos (BANAT NEWS)