Nagbugno kay nag-ilog sa uyab

CEBU, Philippines – Nanga-angol ang duha ka dalaga human kini magbugno, nagpinaakay, ug naglinarotay sa buhok kay nag-ilog sa usa ka lalakeng ilang gihigugma didto sa sitio San Miguel Poblacion, lungsod sa Argao kagahapon sa kaadlawon.

Ang mga naangol mao sila si Emilou Balmatero, 20, ug Rowena Mamac, hingkod,   nga pulos taga barangay Candaguit, lungsod sa Sibonga.

Samtang ang lalake nga ilang giilogan ug gi-awayan mao si Rolly Tapira, hingkod, ulitawo, nga taga San Miguel Poblacion Argao.

Si PO1 Benjamane Gerozaga sa Argao Police Station mibutyag sa Banat News nga si Balmatero maoy unang midangop sa ilang buhatan kagahapon sa alas 2:00 sa kaadlawon ug mireklamo batok kang Mamac kinsa iyang giingong nangulata kaniya og una.

Apan sa paglabay og 20 minutos miabot usab si Mamac kinsa misumbalik kang Balmatero nga matud pa mao kuno’y mibun-og kaniya.

Matud pa ni Mamac   nga nag-estoryahay lang sila ni Tapira nga kanhi niya hinigugma, dihang mikalit lang og duol si Balmatero nga uyab sa lalake.

Unya kay pulos lagi nahigugma sa lalake nga may pagkamestisohon ug artistahon usab, naglalis dayon ang duha hangtod nga nagbugno, nagpinakaay ug naglinarotay sa buhok.

Si Balmatero nakaangkon og samad pinaakan sa iyang abaga ug bukton samtang si Mamac mihubag ug mihuboy ang bagolbagol kay gilarotan sa buhok .

Ang duha kinsa pulos nagpakorasyon didto sa Isidro Kintanar Memorial Hospital pulos nanganti nga mopasaka og kaso batok sa usa’g usa.

Ang mga saksi nagkanayon nga mao rag nagnihit na ang mga guwapo didtong dapita kay nag-ilog man sa usa ka lalake ang maong mga dalaga. – BANAT NEWS