CEBU, Philippines – Ang gidaghanon sa inihaw nga baboy diha sa ihawan sa dakbayan sa Talisay mikunhod na karong mga panahona, apan gitataw ni Talisay City Veterinary officer Dr. Galileo Larawan nga dili tungod sa mikatap nga balita bahin sa swine flu ang hinungdan niini.
Si Larawan sa pakighinabi sa Banat News kagahapon mibutyag nga ang tinuod nga hinungdan niini mao ang kakuwang sa supply sa mga baboy ug ang global economic crisis maoy pipila sa mga hinungdan ning tanan.
Ang ihawan sa siyudad adunay maihaw nga 190 ngadto sa 220 ka mga baboy sa matag adlaw, apan niining semanaha mikabat na lang ngadto sa 179 ka mga baboy ang maihaw matag adlaw.
Matud ni Larawan nga dinhi sa nasud wala pay nahitabo nga dunay insidente kabahin sa swine flu, apan bisan pa niini kanunay silang nagpahigayon og higpit nga inspection ngadto sa mga baboy ug ubang kahayopan nga ipaihaw diha sa ihawan aron masiguro nga limpiyo ang karne ug luwas sa peligro ang nga konsumedor.
Ang Talisay City Veterinarian mibutyag nga umolon pag-usab sa dakbayan ang Talisay City Meat Task Force kinsa siya si Larawan maoy mangulo niini.
Ang maong task force maoy mosuroy sa mga lugar sa siyudad aron panakpon kadtong anha ra mangihaw og baboy sa ilang balay ug ipamaligya ngadto sa ilang mga silingan. Ang maong paagi delikado nga basin ang mga karneng “double dead” makaon sa mga katawhan, matud pa ni Larawan. - Brenda D. Batuto (BANAT NEWS)