Guidelines sa taxi meter nga may resibo nalay gipaabot sa LTFRB -7

CEBU, Philippines – Dili pa dayon mapatuman ang planong pagbutang og mga metrohan sa taxi nga dunay resibo hangtud nga wala pay kamandoan gikan sa Land Transportation and Regulatory Board (LTFRB) sa kaulohan.

Kini ang gipahibawo ni LTFRB-7 regional director Romulo Benardez kagahapon kinsa mipadayag nga sa higayon nga iya nang madawat ang guidelines gikan sa Manila, iya dayong ipatawag ang mga taxi operators alang na sa hingpit nga pagpatuman niini dinhi sa rehiyon.

Matud ni Bernardez nga ang inisyal nga implementasyon sa taxi meter receipts gitakda karong bulan sa Hulyo apan giuswag kini karung 2010, apan ang Korte Suprema mitugot na sa pagpatuman niini ug karon ang guidelines nalang ang gipaabot sa mga rehiyon.

Sumala pa niya niadto pang 2003 nila gi-apelar nga ipatuman na ang taxi meter receipts nalangay pa kini ug karon lang gitugutan, apan sukad pa kaniadto nagpunay na og reklamo ang taxi operators ug drivers tungod sa kamahal sa meter nga dunay receipts.

Apan alang kang Bernardez, mahal gyud tinuod kini apan dako kini og ikatabang sa mga drayber sanglit di na makareklamo batok kanila ang ilang mga pasahero.

Ang taxi meter nga dunay resibo gigamit na karon sa nasud sa Korea ug uban pa, adto lang kini mapalit sa mga accredited nga tindahan sa LTFRB sumala pang Bernardez.

Matud niya nga sa higayon nga iya nang madawat ang guidelines makigtagbo dayon siya sa mga operators ug ubang representante sa lain-laing kahugpungan sa mga taxi operators aron mapatuman ang meter nga dunay resibo. - Rey Pasaporte (BANAT NEWS)