CEBU, Philippines – Gipangita na karon sa mga kadagkuan sa Dangerous Drugs Board (DDB) ang usa sa tulo ka mga tinun-an sa college kinsa positibo sa paggamit sa illegal nga drugas atol sa gipahigayong random drug test sa mga tinun-an.
Kini maoy gibutyag ni DDB Undersecretary Atty. Clarence Paul Oaminal sa Banat News kinsa miingon nga ang nahisgutang estudyante mi-undang na sa pagtungha ug dili na nila matultolan sa pagkakaron.
Matud pa ni Oaminal nga nakig-alayon na sila karon sa mga kadagkuan sa Department of Education (DepEd) aron makombinse ang maong tinun-an nga mo-eskuwela pagbalik aron ilang matabangan ug ikabutang ubos sa rehabilitasyon.
Sa pagkakaron giawhag ni Oaminal ang maong tinun-an nga makigkita kanilang taga DDB ug dili kini angay mahadlok kay ang kagamhanan andam nga motabang kaniya aron makapadayon sa iyang pagtungha.
Gipasalig ni Oaminal nga dili angay mahadlok ang maong estudyante kay silang taga DDB ang motabang aron mapanalipdan ang iyang ngalan. – BANAT NEWS