CEBU, Philippines - Temporary Restraining Order kon TRO gikan sa korte sa Manila nga nagdili sa implementasyon sa suspension sa presidente sa Philippine State College of Aeronautics kon PHILSCA buot ipakawalay bili sa kadagkuan sa Commission on Higher Education kon CHED sa kaulohan.
Ang maong suspension gipahamtang ngadto kang Dr. Enerico Sampang nga nag-ingong suspensuhon kini sulod sa unom ka buwan sa Ombudsman tungod sa kasong administratibang giatubang.
Sa nadawat nga impormasyon sa Banat News, ang bag-ong CHED Chairman nga si Emmanuel Angeles pinaagi sa ilang abogado mipasaka og Motion to Quash sa giluwatang TRO ni Manila RTC Judge William Simon Peralta nga naghangyo nga di ipatuman ang suspensyong gipahamtang sa Ombudsman batok kang Sampang.
Si Sampang gikasuhan og administratiba diha sa Ombudsman hinungdan sa maong suspension, apan wala kini maimplementar sa mga sakop sa Board of Trustees.
Sa dihang milingkod pagka Chairman sa Board of Trustees sa PHILSCA si CHED chairman Angeles niadtong Marso 25, 2009 miluwat kini og CHED Special Order No. 18 sa pagpaimplementar sa unom ka bulan nga preventive suspension ni Sampang.
Base sa Akta Republika 8292 ubos sa Sec. 30 sa implementing rules, ang chairman sa CHED dunay katungod pagtudlo og tawong modumala sa nabakanteng mga State Universities ug College Presidents isip Officer In-Charge samtang nag-atubang pa og kaso ang kanhing presidente.
Subay niini, si Atty. Carmelita Yadao Sison ang CHED Director III sa Legal Division maoy gitudlong OIC sa PHILSCA sugod niadtong Abril 3 nga giuyunan sa kadaghanan sa PHILSCA Board of Trustees.
Sa milabay'ng sunod-sunod nga graduation sa PHILSCA Mactan Benito Ebuen Air Base sa dakbayan sa Lapulapu ug sa ilang ulohang tunghaan sa PHILSCA Villamor Air Base gipakita sa mga empleyado ang mainitong pagdawat sa temporaryong pagdumala ni Sison sa maong tunghaan. - BANAT NEWS