'Wanted' sa illegal drugs may patong sa ulo

CEBU, Philippines – Giaprobahan sa Dangerous Drugs Board (DDB) ang paghatag og ganti sa mga tawong makatabang sa kapolisan pagsikop sa magtiayon ug usa ka bayaw nga mipalusot og binultong shabu didto sa Subic Naval Base sa Zambales sa milabay’ng semana.

Si Undersecretary Clarence Paul Oaminal sa DDB mibutyag nga ang paghatag sa maong ganti usa sa kalampusang nakab-ot sa panagtagbo sa mga ‘stakeholders’ kon mga tawong may labot sa pagsumpo sa kalihokan sa ginadiling drugas dinhi sa nasud niadtong Lunes.

Matud pa ni Oaminal nga pinaagi sa sugyot sa Philippine Drug Enforcement Agency (PDEA) nga giuyonan usab sa mga kadagkuan sa Department of Justice (DOJ), Philippine National Police (PNP), ug National Bureau of Investigation (NBI), giaprobahan sa DDB ang   pagpagawas sa kantidad nga angay ihatag niadtong mga tawo nga makagiya sa kapolisan aron pagsikop sa mga suspetsado.

Ang nahisgotang mga suspek mao ang magtiayong Anthony Ang ug Estrella Olino Ang, ug igsoon ni Estrella nga si Manuel Olino.

Kining mga tawhana nahimo na karong ‘wanted’ sa kapolisan human sila makaipsot dihang nasakmit sa mga otoridad sa kapolisan ang gikarga nila sa barko nga gatosan ka kilo nga shabu didto Subic gikan sa China.

Si Anthony Ang may patong sa ulo nga P1 milyon; iyang asawa nga si Estrella, P500,000; ug si Manuel Olino P300,000.

Ang salapi nga ihatag niadtong mga tawong makagiya sa mga otoridad aron masikop kining maong mga suspek magagikan sa pundo sa DDB, matud pa ni Oaminal.

Ang maong panagtagbo sa mga kadagkoan sa mga ahensya nga nagbantay sa kalihukan sa ginadiling drugas sa nasud nga gipahigayon didto sa Waterfront Mactan Hotel sa Lapulapu City, maoy una gawas sa Metro Manila, matud ni Oaminal. - Wen Celen (BANAT NEWS)