CEBU, Philippines – Patay ang usa ka ginang human kini aksidenteng makahikap sa linya sa kuryente samtang nangompay aron ipakaon sa iyang binuhing baka sa sitio Velos barangay Antipolo lungsod sa Medillen niadtong Miyerkules sa alas 12:30 sa udto.
Ang biktima mao si Ignacia Veloso Monterola, 40, minyo, ug molupyo sa nahisgutang lugar.
Matud pa ni SPO2 Roland Reyes sa Medillen police dihang nahinabi sa Banat News nanguha kini sa mga dahon sa kahoy nga kulo dili layo sa ilang pinuy-anan.
Apan dihang gibira sa biktima ang sanga aron pagkuha sa mga dahon niini aksidenteng midapat sa primary line sa Cebu Electric Cooperative 2 ang maong sanga hinungdan nga kini nakuryentihan.
Ang mga silingan misuway pa unta pagtabang ug mihatod niini sa Severo Verallo District Hospital sa siyudad sa Bogo apan gideklarar kini sa mga doktor nga dead on arrival. - BANAT NEWS