DepEd-7 mihangop sa kaso

CEBU, Philippines - Gihangop sa Department of Education (DepEd)-7 ang laraw sa duha ka mga kontraktor sa pagpasaka og kaso batok sa mga sakop sa Bids and Awards Committee (BAC) sa DepEd sa lalawigan sa Sugbu. May labot kini sa nabulgar nga kontrobersya sa anomalosong mga bidding sa P17 milyones nga gahin pagpalit og mga bangko sa mga tunghaan sa probinsya sa Sugbu.

Matud ni DepEd-7 Regional director Recarido Borgonia nga maayo ang maong lakang sa duha ka mga kontraktor aron gyud mahusay ug aron usab mahibaw-an ang matuod kun dunay kalapasan nga nahimo sa maong transaksyon.

Ang Jec Lumber Corporation ug Ramagal Door and Sash Manufacturing maoy nagtinguha sa pagpasaka og kaso batok sa mga sakop sa BAC human sa gihulagway nila nga pagdaot sa ilang dungog.

Samtang gibutyag usab ni Borgonia nga niabot na kagahapong adlawa dinhi sa Sugbu ang mga imbestigador gikan sa ulohan nilang buhatan sa DepEd Manila aron mohimo og imbestigasyon kabahin sa maong kontrobersya.

Matud ni Borgonia ang maong team sa mga imbestigador gikan sa Manila gipangulohan kini sa Acting Secretary sa legal affairs sa DepEd Manila. (Rey Pasaporte) (BANAT NEWS)