CEBU, Philippines - Dul-an usa ka milyon ka pesos nga kantidad sa mga gipayuhot nga tambal gikan sa nasud sa Taiwan ang gisakmit sa Customs sa Mactan inabagan sa Bureau of Food and Drugs-7 sa milabay'ng simana.
Base sa nasayran sa Banat News, ang maong mga tambal gisulod sa tulo ka kahong gikan sa Taiwan luwan sa Cathay Pacific Flight No. CX 921 nga diha miagi sa Hongkong niadtong Abril 1, 2009 ug gibutang sa Fedex Bonded warehouse sa MCIA.
Ang consignee niini mao ang May Pharma nga nahimutang sa dalan F. Ramos dakbayan sa Sugbu diin ang maong kargamento gipahimutang sa Fedex Bonded warehouse sa MCIA.
Nasigpatan ang maong kargamento sa mga sakop sa Customs Intelligence and Investigation Services kon CIIS pinangulohan ni Julius Reynoso Dalang niadtong Abril 16 nga kadudahan hinungdan nga miluwat dayon og alert order si Customs Port of Mactan Collector Atty. Ernesto Urbano.
Ang Bureau of Food and Drugs nga girepresentahan ni Anthoniette Cuyos giimbitar aron masusi ang maong mga tambal ug ang actual nga pag-imbentaryo niini atubangan sa tag-iyang si May Escoro Lim.Nasuta atol sa maong imbentaryo nga nakalapas ang tag-iya sa labeling requirements dinhi sa nasud tungod kay ang mga brand name sa maong mga tambal gisuwat sa dagkong litra ug ang generic name gisuwat sa gagmay'ng letra. - Bong Soriano (BANAT NEWS)