CEBU, Philippines - Giyam-iran lang sa Federation of Senior Citizens Associations of the Philippines (Fescap) ang Senate Bill 3153 ni Senador Bong Revilla Jr. nga nagtinguhang himuong 32 porsiyento gikan sa 20 porsiyentong diskwento sa mga senior citizen. Matud pa ni Fescap president Felix Abella nga kapitan sa barangay Labangon wala hingpit mapahimusli ang 20 percent discount tungod sa 12% nga Value Added Tax (VAT).“
“Wala man gani mapatuman ang 20% nga discount how much more kung himuon nang 32%, ulog-ulog man lang na sa mga tiguwang,”sumala ni Abella ug midugang nga walay tindahang mosukol sa 32 porsiyento tungod kay karon palang dako nang lalis ang paghatag sa 20 porsiyento kanila. Mas pabor si Abella sa nahaunang balaudnon nga gipalabang ni Senador Mar Roxas nga SB 3061 nga mag-exempt sa mga senior citizen sa 12 porsiyentong VAT nga gikatahong giduha-duhaan sa Malacañang pag-aprubar.
Giingong nabalaka ang Palasyo nga mamahimong precedent o sumbanan ang nahisgutang proposal aron mangayo usab og susamang exemption ang ubang sektor. Subay niini niingon si Abella nga mumugna na lang ug kaugalingong partylist group ang mga senior citizen alang sa sunod tuig nga eleksyon aron makakuha og Countrywide Development Fund (CDF) nga magamit alang sa ilang mga sakop kung dunay molusot sa ilang mga nominado. – BANAT NEWS