CEBU, Philippines - Mobalik sa bulan sa Hunyo ang random drug testing sa pampubliko ug pribadong tunghaan sa sekondarya sa tibuok Central Visayas sumala pa sa Department of Education (Dep-Ed)7.
Si Dep-Ed-7 Health and Nutrition Unit Officer in charge Dr. Berna Ysulan mibutyag nga temporaryo nilang gihunong ang pagpahigayon og drug test niadtong Marso 13 tungod sa kakulang sa analysts sa National Research Laboratory kinsa maoy gitahasan sa pag-supervise niini.
Kini tungod sa pagpadala kanila didto sa National Capital Region aron unahon ang drug testing sa mga tinun-an sa maong rehiyon.
Miabot na sa 20.56 porsiyento ang natapos sukad nagsugod ang random drug test niadtong Pebrero 23 sa 205 ka mga pampubliko ug pribadong tunghaan sa kinatibuk-ang 997 nga maoy ila untang target niini sa tibuok rehiyon siyete.
Sa gipadala nga team sa Dep-Ed bugtong lang ang Lapulapu, Bogo ug Naga ang nakahuman sa ilang pagpahigayon og random drug test sa mga tinun-an samtang wala pa kasugdi sa Negros Oriental, Bohol ug Siquijor. – BANAT NEWS