CEBU, Philippines - Gumikan sa mga reklamo kabahin sa pagpaturagas og parking sa mga armored car services sa dakbayan nagplano ang Cebu City Traffic Operations and Management (Citom) nga ang mga balay patigayon nga ilang adtuan mao nay pabayron sa ilang mga violations.
Kini tungod usab sa giingong kalisod dakpon sa nahisgutang matang sa sakyanan nga dili magpakabana sa mga traffic signs sa kadalanan.
Matud sa vice chairman sa Citom nga si Rogelio “Jingjing” Osmeña nga sagad sa mga armored vehicle magpataka lang og parking bisan sa mga lugar nga gidili.
Nagkanayon si Osmeña nga pinaagi sa pagsilot sa mga establisamento, ang mga balay patigayon na maoy mangita og paaging mapahiluna ang mga armored vehicle.
“So, ang mga establishment na maoy plano namong i-penalize, bangko ba ron o tindahan nga magkuha og armored truck,” sumala ni Osmeña. Nasayran nga makapila na ipatawag sa Citom ang presidente sa asosasyon sa nanag-iya og mga armored cars sa Sugbu nga si Danny Rodis, apan kini mipadayag nga walay gibungang maayo ang ilang panagtagbo kabahin sa pagdisiplina sa ilang mga sakop.
Kini ang hinungdan nga mopanday sila og ordinansahon nga iduso sa City Council batok sa mga badlungong driver sa mga armored car.
Una nang gireklamo sa mga traffic enforcer ang mga armored car nga dili mohunong kung makahimo og traffic violations sa kadalanan.
Gani gisugyot sa Citom kaniadto nga ipagukod sa mga sakop sa SWAT sa siyudad ang mga armored trucks nga padayong mobaliwa sa mga traffic sign.
Wala hinuon matino kung napatuman ba ang maong plano sa Citom taliwa sa padayong pagmagahi niini pagsunod sa traffic rules and regulations.
Apan matud pa ni Osmeña nga dili sila mohunong pagpangita og paagi nga mahatagan og leksyon ang mga drayber o ang tag-iya ba hinuon sa mga armored car. - Elly Bolonos (BANAT NEWS)