CEBU, Philippines - Suportado ni Cebu City ABC president Eugenio “Jingjing” Faelnar ang lakang sa kapulisan sa dakbayan pagpasaka og kaso niadtong madakpang operator og tigbakayan sa siyudad apan mikisi-kisi siya may labot sa bahad sa kapolisan nga apilon og dakop ang mga barangay kapitan.
Matud pa ni Faelnar nga ang pagsang-at og kaso maoy angayang himuon kung kini seryuso sa kampanya batok sa nahisgutang matang sa illegal nga sugal.
Ang pasidaan giluwatan ni Cebu City Police Office Director Senior Superintendent Patrocinio Comendador human masayod nga duna pay daghang tigbakayan sa dakbayan. Gitataw hinuon sa ABC president nga dili na kinahanglang mobahad pa si Comendador tungod kay ang pagpasaka og kaso maoy angayang himoon sa kapulisan.
“Of course natural ra man gyud nang ikiha and if that’s the way how to stop that kind of illegal gambling ikiha gyud,” sumala ni Faelnar.
Dali hinuong mikisikisi ang ABC president sa dugang pasidaan ni Comendador nga ilang ilakip pagkiha ang barangay kapitan sa dapit diin gipahigayon ang tigbakay.
Alang kang Faelnar dili makiangayon nga sila ilakip sa pagkiha tungod kay lisod ang pagsusi sa tigbakay kung kini dili kanunay’ng himuon sa barangay.
“It’s unfair ba kay kung tua na sulod sa balay himoon unsa may kalibutan namo og tigbakay na o dili, nganong dili na man lang ang operator gyud,” dugang ni Faelnar.
Niingon ang ABC president nga iyang klaruhon kang Comendador ang bahad niini atol sa ilang Police Coordinating and Advisory Council (PCAC) meeting karong adlawa.
Gipadayag hinuon ni Faelnar nga kung tinud-on sa kapulisan ang pag-apil sa barangay kapitan pagpasaka og kaso wala na silay mahimo niini gawas sa pag-atubang. - Elly Bolonos (BANAT NEWS)