Patay'ng lawas gisusi kun kauban sa gikapinusilay sa duha ka polis

CEBU, Philippines - Gisusi karon sa kapolisan ang napalgang patay'ng lawas sa usa ka drayber sa traysikad nga taga lungsod sa Cordova kun kauban ba kini sa tulo ka mga lalaking namusil sa barangay Basak, dakbayan sa Lapulapu nga gikapinusilay usab sa duha ka mga polis sa Police Regional Office (PRO) 7 sa miaging gabii.

Si PO1 Jezzel Fal-ing sa Homicide Section sa kapolisan sa maong dakbayan nga nahinabi sa Banat News mibutyag nga gisusi nila karon ang sirkumstansya sa kamatayon ni Dante Baguio, 33, taga barangay Bangkal sa lungsod sa Cordova.

Si Baguio nakit-ang wala nay kinabuhi ug may samad pinusilan sa lawas diha sa utlanan sa barangay Suba sa Cordova ug sa sitio Sudtungan sa barangay Basak sa dakbayan sa Lapulapu.

Gisusi karon sa kapolisan kun gi-salvage ba kini o kaha usa sa tulo ka mga lalaking gikapinusilay nila ni PO1 Rene Bentulan ug PO1 Archel Tero nga mga residente sa barangay Basak kinsa naalarma dihang nakabati og mga buto sa armas sa miaging gabii.

Sa ilang pagsusi ilang naabtan ang tulo ka wala hiilhing mga armadong lalaki nga maoy mipusil kang Rogelio Cabalhog, samtang ang naulahi naghigda sa ilang balay ug naigo na sa tiil.

Dihang nakabantay ang tulo giunhan nila pagpusil ang duha ka polis hinungdan sa nahitabong sinukliay sa bala apan dali usab nga nakaikyas ang mga suspek.   (Romeo Limpangog)   (BANAT NEWS)