Dakbayan motabang sa mga polis kun ikiha

CEBU, Philippines - Gipasalig sa kagamhanan sa dakbayan sa Sugbu pagtabang sa kapulisan nga gihulgang ikiha sa pipila ka residente sa barangay Talamban.

Kini human usab sunoga sa mga polis ang ruwedahan sa gironda niining tigbakayan diha sa maong dapit sa miaging semana lakip na ang pipila ka tindahan.

Matud ni acting mayor Michael Rama nga andam ang siyudad paghatag og abogado sa mga polis kung ihinayon ang pagpasaka og kaso batok niini.

Ang City government duna na hinuoy gihulma nga grupo sa mga consultant nga mga abogado, aron maoy molaban sa mga polis nga mag-atubang og kaso.

Kini gipanguluhan ni kanhi Konsehal Manuel Legaspi nga usa usab ka abogado ug sa samang higayon consultant sa kagamhanan sa dakbayan.

Gipadayag ni Rama nga iyang gikalipay ang pagtubag sa mga polis sa reklamo nga gipadangat niini labot sa tigbakayan diha sa barangay Talamban.

“I’m very happy that they responded to a complaint because I’ve never been in favor the advocacy of promoting illegal gambling and tigbakay is illegal,” sumala ni Rama.

Nagdumili hinuon pagpadayag ang acting mayor kung kini pabor ba nga sunugon ang mga ruwedahan sa rondahon sa kapulisan nga mga tigbakayan.

Apan gitambagan sa acting mayor ang kapulisan nga mangandam sama nga ang siyudad nangandam usab sa tabang nga itunol niini.

Una nang gisuportahan ni ABC president Eugenio “Jingjing” Faelnar ang gihimo sa kapulisan nga pagsunog sa ruwedahan sa gireklamong tigbakayan sa Talamban. (Elly Bolonos)   (BANAT NEWS)