CEBU, Philippines - Nahibalik na sa normal ang pag-agi sa mga delivery ruck sa dakbayan sa Mandaue human libkasa ang gihimong dry run bahin niini, niadtong miaging adlaw.
Kini ang nasayran sa Banat News kang Domingo Cortes sa Traffic Enforcement Agency of Mandaue (TEAM) nga nahinabi kagahapon.
Si Cortes miingon nga sa sayo pa gihimo ang usa ka dry run sa pagdili sa mga delivery truck sa pag-agi sa tanang dalan sa dakbayan nga naglakip sa A.C. Cortes Avenue, Ouano Avenue, M.C. Briones, J. Plaridel, M.L. Quezon, A.S. Fortuna, Highway Seno Avenue, Gerardo Ouano Avenue, Catalino C. Ouano St, Jose P. Rizal, H. Cortes Avenue ug uban pa.
Ang maong dry run gihimo gikan niadtong Marso 9, hangtod Marso 28 niining tuiga sa mga oras sa alas 6:30 hangtod sa alas 8:30 sa buntag, ug gikan sa alas 4:30 sa hapon hangtod sa alas 8:30 sa gabii.
Si Konsehal Emiliano Rosal nga maoy chairman sa committee on transportation sa konseho sa maong dakbayan mibutyag sa Banat News nga mopahigayon sila og public hearing kalabot niini.
Gitataw niya nga ilang iduso sa katawhan ug mga negosyante sa dakbayan sa Mandaue, Consolacion ug dakbayan sa Lapulapu ang pangutana kun uyon ba sila sa maong paagi o dili.
Matud pa niya nga mahingpit ang pagpatuman sa truck ban kun mapanday na ang ordinansa alang niini.
Gipasabot ni Rosal nga daghan kaayong reklamo sa sektor sa mga negosyante nga naapektohan sa maong balaod tungod sa dakong epekto niini sa ilang kinitaan. - Romeo T. Limpangog (BANAT NEWS)