Mandaue Fiesta dili magpaapekto sa krisis

CEBU, Philippines - Bisan pa sa krisis nga nasinati karon sa nasud di kini makabalda sa mga kalihukan pahinungod sa kapistahan sa dakbayan sa Mandaue sa umaabot Mayo 8.

Kini gisugdan sa pormal nga paglusad sa Mandaue Fiesta ug pagpaila sa mga kandidata sa Miss Mandaue 2009 ngadto sa mga sakop sa media didto sa Park Mall Mandaue Reclamation Area kagahapon.

Gipasabot ni Mandaue City Mayor Jonas Cartes nga bisan pa sa krisis nga nasinati karon giisip kini niyang oportunidad sa dakbayan nga mapadaplin una ang krisis alang sa ilang patron nga si San Jose.

Matud pa ni Cortes nga makaginansiya ang dakbayan lakip na ang mga negosyante atol unya sa ilang usa ka bulan nga kalihukan gikan sa mga mobisitang langyaw, turista ug balikbayan.

Si Editha Cortes ang co-chairman sa Finance sa komitiba nga naglihok alang sa maong pista mitug-an nga hangtod karon wala pa silay klarong budget kun pila gyud ang gastuhon.

Sa pagkakaron ang komitiba padayon pa sa pagtigum niini gikan sa mga hinabang sa mga dagkong tindahan sa dakbayan nga boluntaryong gihatag sa mga negosyante.

Matud pa sa mayor di rason ang nasinating krisis sa kalibutan aron di makapahigayon og kapistahan ang patron ug bisan unsa may makab-ot gikan niini ilaha kining ipahinungod kang San Jose agi og pasalamat sa mga kalamboan sa nangaging katuigan sa dakbayan.

Ang 15 ka Miss Mandaue candidates pagahukman sa umaabot nga petsa 7 sa bulan sa Mayo kung kinsa ang makakuha sa korona.   (Bong Soriano)   (BANAT NEWS)