Tulo ra positibo's drugtest

CEBU, Philippines - Tulo ka mga tinun-an sa high school dinhi sa Sugbu ang nasutang positibong tiggamitan og ginadiling drugas human ipagawas na ang mga resulta sa gipahigayong random drug screening sa nagkadaiyang eskuylahan dinhi sa Metro Cebu.

Wala hinuon ibutyag ni Dangerous Drug Board acting secretary, Clarence Paul Oaminal sa pakighinabi sa Banat News sa telepono kagahapon kun haing tunghaan maggikan ang maong tulo ka tinun-an apan giingong gikan ang tulo sa inilang tunghaan dinhi.

Sumala pa niya duha niini migawas sa inisyal nga drug screening result migamit og Marijuana ug ang usa methamphetamine hydrochloride kun shabu.

Gitataw hinuon ni Oaminal nga ang maong resulta sa drug screening ila pang ipadala ngadto sa PDEA sa Manila alang sa confirmatory test, una pa nila ideklarar ang resulta.

Matud pa ni Oaminal wala magpasabot nga kun mapositibo sa drug screening positibo kini dayon sa confirmatory test tungod kay dunay mga higayon nga nitumar og tambal ang usa ka tawong gipailawom sa drug screening ug kini makita pinaagi niining confirmatory test.

Kun mogawas nga positibo gyud ang tulo, pahibaw-on sa Department of Health ang Department of Education-7 ug mao nay mopahibalo sa principal sa maong tunghaan aron ipatawag ang ilang mga ginikanan.

Samtang wala usab magpasabot nga i-rehabilitate dayon ang mga tinun-an tungod kay ipailawom pa sila og counseling uban sa ilang mga ginikanan, ug ipasusi pa sa espesyalista alang sa drug dependency examination kun kinahanglan ba gyud ang rehabilitasyon.

 Ang mga ginikanan usab maoy pabut-on kun ang rekomendasyon nga ipa-rehabilitate kini ug dili apan giklaro ni Oaminal nga ang rehabilitasyon bago sa gobiyerno kun motugot ang ginikanan.

Samtang giklaro usab ni Oaminal nga di usab kini mamahimong rason aron taktakon, suspensuhon o di makapaso sa graduation ang usa ka tinun-an lakip na usab ang pagdili kanilang maka-enroll sa kolehiyo.

Ang Rehiyon 7 dunay 99,090 ka tinun-an sa private ug public high schools nga girepresentahan sa 1,727 ka tinun-ang ipailawom sa drug screening. (Edwin Ian Melecio uban sa report ni Chester Abadilla)