Naga reef dagha'g dap-ag

CEBU, Philippines - Usa ka grupo sa mga environmentalist mirekomendar sa dakbayan sa Naga sa pagpreserbar isip protected area sa coral reef o “takot”sa dakbayan tungod sa pagkatap sa mga crown-of-thorns starfish (COTS) kon dap-ag sa maong takot.

Ang COTS o dap-ag usa ka klase sa starfish nga dunay hilo ug kusog kaayo mangaon og mga gasang.

Ang Knight-Stewards of the Sea, Inc. (Seaknights) kinsa misumiter og dive report niadtong Biyernes kang Mayor Valdemar Chiong nagkanayon nga kinahanglan ang siyudad mogama og lakang sa daling panahon nga mahimong marine protected area ang takot niini.

Ang nahisgutang grupo nakadiskubre nga ang maong lugar nalukop na sa dap-ag o mga COTS nga maisip na karong anaa sa alarming stage.

Si William Villaver, usa ka sakop sa Seaknights ug marine biologist mipasabot nga kung ang usa ka ektarya sa maong takot puy-an og 30 ka COTS, balig usa usab ka square foot nga gasang ang kaunon niini sulod sa 24 oras.

Apan kung ang gidaghanon niini molapas na sa 30, matawag na kining outbreak, ug kinahanglang ang maong mga star fish angay nang hingpit nga mawagtang gikan sa lugar aron dili kini makadaot sa takot.

Ang Seaknights andam usab nga mopahigayon og mga exploration diha sa takot sa Naga aron masuta nila kun asa nila ibutang ang usa ka buya alang sa usa ka lugar nga ilhon nilang usa ka sangtuwaryo sa mga isda nga dili angayang panguhaan og isda. - BANAT NEWS