CEBU, Philippines - Si Kongresista Eduardo Gullas sa unang distrito sa Sugbo mibutyag nga mitambong siya sa kasaulogan sa 64th Landing Celebration kagahapon sa dakbayan sa Talisay tungod sa tulo ka rason.
Sa 25 minutos nga speech sa Kongresista nagkanayon kini nga sa milabay’ng tuig misaad siya nga dili motambong sa kalihukan kung dili mahuman ang mga estatuwa ug renovation sa landing marking nga karon usa na ka national landing shrine isip pasidungog ngadto sa mga beterano sa World War II.
Unang katarungan nga gibutyag sa Kongresista nga buot siyang mopasidungog sa mga bayani ug mga beterano ug ilang bayanihong nabuhat sa nasud.
Ikaduha mao ang pagpasalamat ni Gullas sa Patrona sa siyudad nga si Santa Teresa de Avila tungod kay naluwas ang mga Pilipino ug Amerikanong mga sundalo niadtong panahon sa WW II kinsa mitakas sa Talisay.
Ang ikatulo mao nga dili siya makabalibad sa hangyo sa mga Talisaynon nga sumala pa niini di gyud kabalibaran.
Si Gullas miawhag sa mga Talisaynon nga agi og pagtahod ug pagpasidungog sa mga beterano sa gubat kinahanglang ampingan ang kinaiyahan diha sa dakbayan ug sa tibuok lalawigan.
Sumala pa niini kinahanglang batasanon ang pagpanglimpiyo sa kabaybayonan sa dakbayan tungod kay aron dugokon sa mga turista nga lokal ug langyaw.
Giawhag usab ni Gullas ang kagamhanan sa dakbayan nga ipadayon ang imbestigasyon sa pagkaguba sa Lagundi Reef tungod kay matud pa niini maisip na nga milagro ang paglambo ug pagdako sa maong gasang bisan paman nga kini giabuso sa mga illegal fishers kaniadto, apan gumikan sa maong insidente sa barko naguba kini sa usa lang ka pamilok. - Brenda Batuto (BANAT NEWS)