Bimbo Fernandez di mohunong hangtod di mag-uli si Gwen ug Tom

CEBU, Philippines - Padayong mangita og paagi si Cebu City Administrator Francisco Fernandez nga magkauli ang maayong kabubut-on nilang Mayor Tomas Osmeña ug Gobernadora Gwendolyn Garcia.

Kini human mapagya ang gitawag nga ‘backdoor negotiations’ tali nilang Fernandez ug ni Capitol consultant Rory Jon Sepulveda.

Ang gobernadora gikataho nga nimando na pagpahunong sa nahisgutang matang sa sabot-sabot human mabutyag ang maong tinguha tungod sa pagdudang di sensiro ang mga opisyales sa dakbayan sa ilang kasabutan tungod sa pagkapagya sa maong ‘secret memorandum.’

Apan matud ni Fernandez nga siya dili mohunong pagpangita og paagi nga mahatagan og kasulbaran ang panagbangi sa duha ka lider sa Sugbu.

Gani gipadayag nang daan sa City administrator nga dili niya igsapayan nga mainsultuhan sa mga opisyal sa probinsya sa iya unyang himuon.

“Of course I’m embarrassed nga makigkita ka unya balibaran but I’m willing nga ma-embarrassed para lang magkasinabot ta,” sumala ni Fernandez.

Gitataw ni Fernandez nga walay nagsugo kaniya nga makigdayalogo sa mga opisyal sa probinsya kun dili kini iyang personal nga kabubut-on.

Giangkon sa City administrator nga daghan ang maapektahan kung magpadayon ang panagsungi sa duha ka lider ug siya dili usab makatugot niini.

Sukwahi hinuon sa gihimo sa gobernadora ngadto sa iyang mga sakop, dili pugngan ni Osmeña si Fernandez sa nahuna-hunaang lakang.

Apan gitataw sa mayor nga ilang padayunon ang pagpugong sa mga government-owned lots diha sa Banilad-Talamban (Ban-Tal) area nga matukuran og mga establisamento.

Kini tungod sa pagtoo ni Osmeña nga ang bisan unsang development diha sa maong dapit makadugang sa kahuot sa dagan sa trapiko sa Ban-Tal area.

Una na hinoong gipadayag sa mayor nga ang maong problema andam niyang isakripisyo kung mahatagan og kasiguruhan sa ilang pagpuyo ang 5 mil ka pamilya ubos sa 93-1 ordinance niini.

Wala malipay si Osmeña sa gihimo sa Kapitolyo nga gihinay-hinay niini pag-release ang deeds of sale sa mga occupants tungod kay dugay na kining naimpasan og bayad. - Elly Bolonos uban sa report ni Chester Abadilla (BANAT NEWS)