CEBU, Philippines - Patay nang nahidangat sa tambalanan ang usa ka mangomprahay og scraps dihang gidasmagan ang gimaneho niining traysikad sa sakyanang gimaneho og Koreano diha sa sitio Buac barangay Don Pedro siyudad sa Bogo niadtong Lunes sa alas 4:00 sa hapon.
Ang biktima mao si Ricardo Ylanan, 50, molupyo sa sitio Kalubihan ug mangomprahay og mga scraps sa maong lugar samtang ang Koreanong nakadasmag kaniya mao si Eugene Lee, nga nagpuyo sa Maria Luisa Village sa barangay Banilad dakbayan sa Sugbu.
Si Lee nagmaneho sa iyang Hyundai nga dunay plakang GTA-365.
Matud pa ni PO3 George Ocena sa Bogo City police dihang nahinabi sa Banat News nagsunod ang maong sakyanan sa biktima nianang tungura.
Pag-abot sa maong lugar nisuway og overtake ang maong langyaw apan naatol nga dihay gikasugat diha sa pikas lane hinungdan nga naapekihan ug pagbalik niini sa tuo nadasmagan niini ang biktima.
Ang biktima gikatahong nalabay padulong sa sakyanan ug didto motugpa sa windshield dayon nahagbong sa semento hinungdan sa naangkong dakung kadaut sa iyang ulo.
Gisuwayan unta pagdala sa Bogo City District Hospital ang biktima apan gideklarar kining dead on arrival samtang ang langyaw boluntaryong nitahan sa iyang kaugalingon ug mipadayag og kaandam pag-abaga sa tanan niyang obligasyon. - BANAT NEWS