Jeepney gitulis sa duha

CEBU, Philippines - Gitulis sa duha ka armadong mga lalaki ang usa ka pasaheroang jeepney nga nagbiyahean sa Labangon-Ayala alas-12 sa udto kagahapon sa hapon diha sa dalan B. Rodriguez, barangay Sambag II ning dakbayan.

Gihimulbulan sa duha ka tulisan ang upat ka pasaherong sila si Sherilyn Villavelez, 29, usa ka magtutudlo; Norma Pahayahay 29; Diane Veloso,25; ug Eleonor Araneta nga usa ka tinun-an.

Ang upat midangop sa Police Station 2, apan si PO1 Liezel Tumada sa pakighinabi sa Banat News nagkanayon nga wala na maabti sa mirespondeng mga polis ang mga tulisan.

Ang duha gikatahong pulos armado og pusil ug nagpakaaron-ingnong pasahero apan pag-abot sa maong dapit kalit silang gitiunan sa duha ug mideklarar og tulis.

Ang maong jeepney gikan pa sa Ayala Business Park ug padulong sa Labangon diha agi sa dalan N. Bacalso Ave., ang duha ka mga tulisan diha mipara ug nanakay sa eskina sa N. Bacalso ug V. Rama.

Ang mga biktima wala na mopakita og pagsupak dihang gitiunan tungod sa kabalakang sila pasakitan sa duha hinungdan nga yano rang gipanguha ang ilang mga handbags ug tulo ka cellphone ug cash nga P1,300 ni Villavelez ug P3,000 ni Veloso.

Ang mga tulisan nagdali og panganaug human sa paghimulbol sa mga biktima. - BANAT NEWS