CEBU, Philippines - Ang mga sakop sa hunta probinsiyal misalmot usab sa pag-awhag sa chairman sa Securities and Exchange Commission (SEC) Fe Barin ug ang upat niini ka mga komisyoner nga mopalta o kaha moundang sa ilang trabaho.
Kini tungod sa kapakyas sa paghimo og konkretong aksyon labot sa pagkahagba sa tulo ka mga Pre-need nga kompaniya nga gipanag-iya ni Celso delos Angeles, ang tag-iya sa nabangkarotang Legacy groups of Companies.
Sa gipasar nga resolusyon ni Provincial Board member Victor Maambong, kini nagtataw sa pagkawala gyuy nahimo ni Barin ug sa upat ka mga komisyoner sa mga binuang nga gihimo sa nagdumala sa mga kompaniyang Pre-need ni De los Angeles.
Gipasabot ni Maambong sa iyang resolusyon nga ang maong anomaliya nakapasamot sa kapobre sa mga Filipino nga imbes nagtigom og kwarta pinaagi sa pagpamiyembro sa maong mga pre-need nga kompaniya para sa edukasyon sa ilang mga anak, gipangwaldas lang sa nagdumala niini ug naalaot ang mga biktima.
Busa miingon si Maambong nga angayan lang nga manaog sa ilang katungdanan ang maong mga opisyales sa SEC tungod kay wala kini kapuslanan. - Chester Abadilla (BANAT NEWS)