CEBU, Philippines - Duha ka mga vintage bombs nga gituohang panahon pa sa milabay’ng ikaduhang gubat sa kalibutan nakuykuyan diha sa barangay Campusong sa lungsod sa Borbon sa mga luna nga gipanag-iya sa magpapatigayong Lhullier niadtong Huwebes sa hapon.
Ang security officer sa luna nga si Rodolfo Tudlasan mi-turn-over sa kapulisan sa maong duha ka 5-kilogram bombs nga nakuykuyan sa managlahing lugar sa maong luna nga tukuran og edipisyo.
Matud pa ni Insp. Camili Gonzaga, hepe sa Borbon Police dihang nahinabi sa Banat News ang backhoe operator nga nagkubkob sa yuta nianang ala-una sa hapon nakamatikod sa tayaong butang nga pormang bomba nga iyang nakuykuyan sa lungag.
Duha ka oras ang milabay laing bomba na usab ang nadiskubrehan pipila lang ka metros gikan sa lugar diin unang nakuykuyan ang unang bomba.
Wala hinuon matino kun unsang matang sa bomba ang nakuykuyan apan dako ang ilang pagtuong gikan pa kini panahon sa pakiggubat sa Pilipinas sa mga Hapon.
Ang maong mga vintage bombs i-turnover kini ngadto sa bomb disposal unit sa Cebu Police Provincial Office (CPPO). - Darrel Carumba (BANAT NEWS)