CEBU, Philippines - Naaprobahan na sa mga sakop sa hunta probinsyal sa Sugbu atol sa ilang sesyon kagahapon ang resolusyon ni board member Bea Mercede Calderon nga naghatag og P10 mil nga hinabang pinansyal alang sa Siloy Festival sa lungsod sa Alcoy.
Ang maong pundo gamiton sa contingent sa Alcoy alang sa ilang pagsalmot sa Aliwan Festival didto sa Metro Manila karong umaabot nga Mayo.
Matud pa ni board member Calderon nga dako usab siya og pagsalig sa Siloy Festival sa Alcoy nga modaug sa Aliwan festival gumikan kay makadaghan naman makadaog ang maong grupo sa mga Sinulog festival sa dakbayan sa Sugbu, ug nahimo na usab kining kampiyon sa gipahigayong festival sa lungsod sa Carmen niadtong milabay’ng mga buwan.
Nasayran nga ang Siloy festival nakadaog usab sa nakalabay’ng Pasigarbo sa Sugbu sa milabay’ng tuig nga gipahigayon diha sa Cebu International Convention Center (CICC) nga gisalmotan sa tanang contingent gikan sa lain-laing kalungsoran sa probinsya sa Sugbu. - Rey B. Pasaporte (BANAT NEWS)