CEBU, Philippines - Nailhan na sa kapolisan ang mipatay kang Cebu City Assistant City Prosecutor Patrick Osorio kinsa gibanhigan niadtong Enero ning tuiga apan wala magdali ang kapulisan sa pagpasaka og kaso sa suspetsado.
Kini maoy gipasabot ni Sr. Supt. Patrocinio Comendador, hepe sa kapulisan sa dakbayan sa Sugbu kinsa mao usab ang Task Force Osorio Commander, agi’g tubag sa mga pakisusi bahin sa kalangay sa kasulbaran sa maong kaso.
Matud pa ni Comendador nga aduna na sila’y mga imbestigador nga gisugo sa pagpanguha og dugang kasayoran bahin sa maong krimen gikan sa mga testigos niining maong kaso.
Giangkon ni Comendador nga ang nakalangay sa ilang imbestigasyon niini, mao ang pagkuha og mga testigos nga mopirma og apidabit bahin sa nasaksihan nila niadtong pagluthang patay kang Osorio didto sa Gochan subdivision, barangay Mambaling, ning dakbayan sa Sugbo.
Apan wala magpasabot nga nagmika sila, matud pa ni Comendador kinsa nagkanayon nga gihimong subsob karon ang ilang imbistigasyon sa maong kaso.
Gibutyag ni Comendador nga niadto pang Enero nila nahibaw-an ug nailhan ang usa sa duha ka mga supetsadong mipusil patay sa piskal.
Apan gitigom una nila ang tanang apidabit sa mga testigos aron nga labing molig-on ang kaso, matud pa ni Comendador uban sa pag-ingon nga may kalabotan sa trabaho ang hinungdan sa pagpatay kang Osorio. - BANAT NEWS